Aнд...лог

Архины шалтгаант оюун ухааны хомсдол

( алкогольная олигофрения )

Эцэг, эх хоёрын хэн нэгийн буюу хоёулангийн согтуу үед олсон хүүхдүүдийн мэдрэл сэтгэц нь төрөлхийн согогтой, оюун ухаан нь хомсдолтой, авир араншин нь гажигтай, бас нэг буюу хэд хэдэн эрхтэний төрөлхийн согогтой байдгийг эрдэмтэд эрт дээр үеэс ажиглан, бүтээллүүддээ тэмдэглэсээр ирсэн түүхтэй.

Үр тогтох өдөр ууж согтуурсан эцэг эхчүүдээс оюуны хомсдолтой хүүхэд төрдөг болохыг дэлхийн анагаах ухааны түүхэнд анагаах ухааны эцэг хэмээн нэрлэгддэг Гиппократ, тэрчлэн согтоох ундаа хэтрүүлэн хэрэглэгчдийн үр угсаанд оюуны хомсдол удамшин дамждаг болохыг Чарьлз Дарвины өвөг эцэг хэмээн Эразм Дарвин, тэрчлэн усан тэнэг (идиот) буюу хамгийн хүнд хэлбэрийн оюуны хомсдолтой хүүхдүүдийн бүх эцэг эхчүүдийн 33 хувь нь архи уудаг байсныг, бас 10 хувь нь согтуу үедээ хүүхэд олсныг эмч Морозов, тэрчлэн бага хэмжээний буюу 1,2-4 грамм архийг жирэмсэн эхчүүдийн венийн судсанд тарихад минутын дараа тэр архи эхсээр нэвтрэн хүйн цусанд орж улмаар ургийн бие махбодоор тархан бие сэтгэцийг хордуулан гэмтээдэг болохыг Америкийн судлаач Уолтмен нар тус тус тогтоосон байдаг.

Оюун ухааны хомсдолтой хүүхдэд зориулсан нэгэн тусгай сургуулийн сурагчдийн 800 эцэг эхээс тусгай боловсруулсан санал асуулгаар согтуурлын хор уршгийг тогтооход чиглэсэн Зорин Балаян, Виктор Казьмин нарын судалгаанаас үзэхэд тэдгээр эцэг эхийн 90% нь согтуу байдалд хүүхэд олжээ.

Харамсалтай нь эдгээр эцэг, эхчүүд согтуу байдалд үр тогтохын хор уршигийн талаар юу ч мэдэхгүй байсан байна.

Согтоох ундааны зүйл буюу архи дараах замуудаар дамжин урагт нөлөөлж оюуны хомсдлыг үүсгэнэ. Үүнд:

1. Архины шалтгаант эмгэгтэй бэлгийн эсээс үр тогтоход оюуны хомсдолтой хүүхэд төрнө.

2. Жирэмсэн эхчүүд согтоох ундааны зүйл хэрэглэхэд уусан архи эхсээр дамжин үр хөврөл буюу урагт нөлөөлж оюуны хомсдол үүсгэнэ.

3. Хөхүүл хүүхэдтэй эхчүүд согтоох ундааны зүйл байнга хэтрүүлэн хэрэглэвэл уусан архи хөхний сүүгээр дамжин хүүхдийн тархинд нөлөөлж хөнгөн оюуны хомсдлыг үүсгэнэ.

4. Эцэг эхчүүдийн согтоох ундааны зүйлийг тогтмол хэтрүүлэн хэрэглэвээс хүүхдүүд нь хүмүүжлээр доголдон оюун сэтгэлгээний хөгжил нь саатаж болно.